قصيدة يا بوفاضل انت كافل | باسم الكربلائي | ليلة ٣ محرم ١٤٤٦ | مجالس العزاء | قصيدة مكتوبة
 

قصيدة يا بوفاضل انت كافل | باسم الكربلائي | ليلة ٣ محرم ١٤٤٦ | مجالس العزاء | قصيدة مكتوبة

📜قصيدة : يابو فاضل انت كافل
✒️للشاعر : محمد قحطان الرميثي
📌 : ليالي محرم الحرام
📅: ليلة 4 محرم 1446 هـ
🕌:جامع وحسينية الرسول الاعظم - بغداد حي الإعلام
🎶طور: #يابناتي #من_سواها


يا بو فاضل ... أنتَ كافل
زينب الحُــرَّة الوديعــة
▪️▪️▪️▪️▪️
يا بو فاضل أُمَّــك آنا وهالوصيَّــة
من گبل لا تمشي لارض الغاضريَّة
أخــذ من عندي أمانـــة الهاشميَّـة
يُمَّــه زينب أبد لتشــــوف الأذيَّـة
يالذخرتك ... زينب أختك
لا تُمُر بيها الفَجيعــة
▪️▪️▪️▪️▪️
يُمَّه لو سار الظعــن لارض المُصايب
يگطــع الصحــراء ودروب النــوايب
الشمس بالصحره يبـعد اُمَّك تلاهب
ظَلَّل الزينب مثـل ظِـــل السَّحــايب
يالكفلها ... أحمي ظِلها
لو مِشت فوگـ الوِسيعة
▪️▪️▪️▪️▪️
لو وصلتــوا من بعد رحلة طويلة
يُمّه جَهّـــز أنتَ صيــوان العقيلـة
هذي زينب بت علي الماكو مثيله
يُمّه ما اريد اختك المدمع تسيله
وبخيمها ... أبقى يَمها
يبني يا بدر الطليعــة
▪️▪️▪️▪️▪️
يُمَّه لو رادت عَذِب وَفّي بوعودك
أعتني للمشرعـة او ويّاك جــودك
السَّهم ليهمّـك وَلا ايهمَّك عمــودك
ولو تِطَلَّب هالأمُـــر گطِّـــع زُنودك
يا أملها ... إرجعلها
بالعَذِب من الشِّريعة
▪️▪️▪️▪️▪️
يُمَّــه لو شِلت العَــذب بيــدك تِذَكّر
گلب اخوك اِحسين ذاكَ اللّي توَجّر
وبالعطش گلب العقيلــه نار يسعر
لا تشــربــه يُمَّـه خلني بيك أفخر
يبني صعبة ... لا تشربه
گبل الحسين ورضيعه
▪️▪️▪️▪️▪️
يُمَّــه لو گطعــوهن اچفـوفك يوفّاي
لو صحت خويه او نظرته للنهر جاي
يبني لو شفتــه يحملك گلّــه مولاي
شلون ارد اِو ما جبت لعيالك المـاي
خويه أرجاك ... زينب هناك
شلون ارد والچف گطيعة
▪️▪️▪️▪️▪️
يبني يالعبَّــــــاس يا بـــدر العَشيــــرة
لو مشت أختــك على الهــزّل أسيــرة
وانتَ راس اِعله الرمح بس كله غيرة
عينــك اِعليهــا يَيُمَّـــــــه بالمسيــــرة
يُمَّه عبّاس ... لو فقط راس
عينك لبنت الشفيعـة
▪️▪️▪️▪️▪️