منتدى محبي أهل البيت عليهم السلام - قصيدة حسين كعبتنه | باسم الكربلائي | ليلة ٦ محرم ١٤٤٦ | مجالس العزاء

قصيدة حسين كعبتنه | باسم الكربلائي | ليلة ٦ محرم ١٤٤٦ | مجالس العزاء | قصيدة مكتوبة

📜قصيدة : حسين كعبتنه
✒️للشاعر : وسام الشويلي
📌 : ليالي محرم الحرام
📅: ليلة 6 محرم 1446 هـ
🕌:جامع وحسينية الرسول الاعظم - بغداد حي الإعلام

يا حبيب ابن مظاهر
گوم شيل العلم واظهر
▪️▪️▪️▪️▪️
حسين كعبتنه واجينه انطوفه
والمناسك اصبحت بطفوفه
▪️▪️▪️▪️▪️
حسين دين الله فرض يتبع فرض
بي صارت كربلا اقدس ارض
هو كعبه واحنه حجاج الرفض
مو مخيط الحاج ينزع خوفه
▪️▪️▪️▪️▪️
صوت من وحي الشهاده وبينه ضج
يا حسين عدنه وياك حج
اذن ويأتون ال من كل فج
زلم وكت الموزمه معروفه
▪️▪️▪️▪️▪️
بكربله الاحرام فصلناه جفن
وبعد غيرك لا عشيره ولا وطن
تراب جدمك سيدي جنة عدن
واسمك القرآن كل احروفه
▪️▪️▪️▪️▪️
على اخيامك سيدي يصير السعي
احنه انصارك وصيحتنه بوعي
حاشه يحكمنه الدعي وابن الدعي
ارگاب عدنه ما تهاب سيوفه
▪️▪️▪️▪️▪️
نطوف سبع اشواط ميدان الحرب
بسمك نلبي حجي لسان وگلب
ماي زمزم جود ابو فاضل يصب
ينبع اعلينه وفه من اجفوفه
▪️▪️▪️▪️▪️
صار رمي الجمرات ابكربله
على جيش يزيد واحنه انقاتله
يا هلا بحرب الكرامه يا هله
هاي زلمك للمجد مصفوفه
▪️▪️▪️▪️▪️
ما نحل احرامنه انحل الدمه
حتى من انطيح نصعد للسمه
هي بس وياك حسن الخاتمه
وبيك عنوان الصراط انشوفه
▪️▪️▪️▪️▪️
بكربله يختلف تقصير الشعر
لجل عينك راح ينگص النحر
دون حدك احنه نتگطع وذر
والمهم عدنه العهد منعوفه
▪️▪️▪️▪️▪️
ابوذيات : ماجن ، منصار

ليلي بغير دمع اعليك .. ما جن
وايام الفرج لولاك .. ماجن
عابس لولا حبك ابد ما جن
ولا جان الجنون اندار بيه
▪️▪️▪️▪️▪️
يهل تنشد على الانصار .. منصار
هذوله البيهم التنزيل .. من صار
خلقهم ربك الانصار .. من صار
حسين وخط اساميهم سويه
▪️▪️▪️▪️▪️